呃人嘅總現金價值比率

好多客戶買咗分紅保單之後，每年收到Annual Statement，見到有個「總現金價值比率」，成日都以為呢個就係公司派紅利嘅實際表現。數字通常八成幾、九成，好似幾靚仔。

但事實上，呢個比率好多時候係「化妝」出嚟嘅，唔係真正反映公司有幾誠信。點解？因為佢將「保證金額」同「非保證紅利」一齊加埋嚟計。因爲保證部分一定係100%，咁樣自然會拉高個比率，令到條數冇咁難睇。

點解會有呢個數字？原因好簡單：有啲公司履行比率實在太差（唔開名，費事有人小氣，尋仇），如果淨係攞履行比率出嚟，客戶一睇就知唔掂。於是就「絞盡腦汁」，發明咗「總現金價值比率」呢個新指標，然後教啲Agent點樣講，於是客戶聽落去，好似「都派到八、九成，OK啦」，

例子説明：

保證金額 = $100萬

計劃書預期非保證紅利 = $60萬

（呢個比例就係市場上普遍計劃第10年的大概比例）

實際派到非保證紅利 = $30萬

「總現金價值比率」：130 ÷ 160 = 81.25%。睇落唔係太差。

但實際上，履行比率：30 ÷ 60 = 50%！！

睇唔睇到分別？明明只派到一半，履行比率得50%，但經過「化妝」之後，就變成81.25%。呢個就係所謂「粉飾太平」，令到條數冇咁難睇。

履行比率 vs 總現金價值比率

要搞清楚，兩者本質完全唔同：

- 履行比率：係保監局為咗增加投保人知情權而推出，屬於監管要求，一定要公開披露嘅數據。佢直接反映咗「當初承諾」同「實際派發」之間嘅落差。

- 總現金價值比率：係個別保險公司發明出嚟嘅（雖然而家全行都跟，因為如果人哋有你冇，就好似披露不足），但本質上係用嚟掩飾真相。

所以，精明投保人一定要記住：睇「履行比率」先係重點，唔好聽啲Agent講咩「總現金價值比率」。