top of page

長脚蟹 + 毛蟹

好耐無食,呢個星期六酒局(我生日),又叫下。


之前講過,超級市場雪藏蟹脚都賣到6、7百,好多人就回應話超市有超市嘅方便,收得貴係合理。不過我真係接受唔到,如果試過活蟹,點解仲可以為同樣價錢(甚至仲貴)嘅雪藏蟹辯護。


因爲講緊係蟹,蟹呢種海產,只要一“瞓覺“,品質就會跌得好快。無論點名種嘅雪藏蟹,都比唔上最一般品種嘅活蟹。當年(20年前)响澳洲讀書,只要容入當地食材文化,唔好無果樣揾果樣,牛扒羊扒、各式海鮮,樣樣都平靚正,就算好似我呢D窮學生,都可以食得好好。唯獨就係一樣,蟹。


要知道,鬼佬唔興活海鮮,撈到D蝦蟹,响船上面即刻煮熟、冷藏。蝦無所謂,海鮮舖賣嘅冰鮮熟蝦,一樣鮮甜,肉質彈牙。但蟹,真係唔得,D肉霉、無味。唔係品質等級問題,係蟹肉呢種食材係咁,唔係活蟹即食,就寧願唔食。所以當年,年年放暑假返香港,頭幾日一定餐餐食蟹(我當年住鴨脷洲,好多海鮮賣),無他,餓左成年嘛。


講返星期六D蟹。之前有人話唔應該用上年11月價錢同今年超市價格比較,因爲可能貴左好多。我覺得奇怪,又唔係真係訂過,“可能”、靠估,有咩野意思?因爲据我理解,呢幾年長脚蟹產量好穩定,通脹同運費浮動,令到貴D平D唔出奇,但唔可能上年一隻8舊,今年要一倍。不過我當時都無最新經驗,所以無駁。


呢個星期訂貨,我就可以理直氣壯講,價錢無大分別。一斤仲係288。上年果隻係3斤,所以八百幾蚊,今次因爲得4個人,試下訂細隻蟹,斤半,做特價,388。補多一隻同樣做緊特價(199)嘅毛蟹。


第一眼,覺得隻長脚蟹好細,唔開心,同自己講下次一係唔訂,一訂就一定最細3斤。雖然食落都好鮮甜,但細蟹肉質真係遠遠比唔上大蟹。大蟹成條蟹脚D肉一梭梭,口感好好。


毛蟹第一次訂,真係甜過長脚蟹好多。不過,長脚蟹一個主要賣點係長脚,尤其係大蟹,一剪開個殼,成條蟹肉,如果唔係好識拆蟹嘅人(例如小朋友),方便食好多。


但毛蟹細隻都好食(其實應該係,呢種蟹係咁大),適合我地自己兩個人都可以食,唔似長脚蟹,一定要開P先銷量到。



bottom of page