果日行過海鮮檔，買左斤瀨尿蝦，因爲諗起真係有幾年無食過。其實咁講，都有語病，出去同朋友食飯，或者公事應酬，酒樓大大隻裝响個膠樽裏面果D，就都有食過，但街市成斤買返屋企慢慢剝，就真係好多年無。
原因好簡單，因爲真係貴到唔值（個人覺得）。
我其實好鍾意食海鮮，後生果時（即係廿幾年前），最鍾意放工六點幾去鴨脷州西邨街市（果陣住海怡）睇下有咩野收檔海鮮。果陣未有領展，屋邨街市堪稱平靚正。
我最鍾意就係瀨尿蝦，賣到尾，阿姐但求去貨，記憶中好似兩斤特價五十幾蚊之嘛。然後自己屋企當然唔搞咩野椒鹽（我自己厨藝都無咁嘅水平），白灼就算。不過兩斤蝦，自己慢慢剝，送幾支大啤，都好過癮。
（廿幾歲仔，自己匿埋飲啤酒，我絕對係第一代宅男。不過其實我都好經常出去飲，浦還浦，宅還宅，好極端，各有享受。）
但呢幾年，每次見到，真係買唔落手。好似果日，黃大仙大成街市，低級D嘅草蝦都係108，基圍蝦（而家無正式“基圍”啦）98，就算海中（棕）蝦，都唔過200。就算澳洲龍蝦，都係268之嘛（感謝黨），普通瀨尿蝦要148蚊斤，真係好唔抵。
仲要包保無膏，因爲有膏果D已經揀開另外賣，要三百幾，貴過食龍蝦。
雖然，果日真係諗起好耐無食過，都係買左斤半，二百幾，但返到屋企，真係越諗越唔抵，買隻龍蝦，都唔係貴好多之嘛。我諗還左一次心願後，可能隔幾年都唔會再買。