星期五，個天突然殺一個回馬槍，氣溫急降，寒冷天氣警告。
我呢D邊爐精，當然唔會放過呢次可能係今季最後一次邊爐嘅機會。
（當然，熱天開冷氣無話唔俾打邊爐，但天寒地凍打邊爐先有Feel。）
你話我曬命都係要講，呢個星期做到氣咳，晚晚簽單簽到手軟，都賺到十幾廿萬。
辛苦揾埋自在食，決定去太子一間過去幾年疫情窮到燶時候，唔敢入去嘅“火鍋酒家”試下。
之前睇見門口魚缸又龍蝦又花竹又象拔蚌，都唔好話唔驚。
過去幾年創業撞正疫情咁黑仔，真係唔敢入去。托賴開關後挨過初創艱難期，生意慢慢穩定，少少報復式消費總要。
坐低見隔離抬碟斑片都幾好樣，望多兩眼，阿叔幾十年老江湖，當然即刻Sell我。
我話我地兩個人，食唔曬咁大碟。阿叔話照枰，人地人多叫三斤咪大碟，我地兩個人可以一斤，35蚊一兩，話係咩野黃皮老虎，呢個價錢，當然海魚啦。
其實，35蚊一兩，係覺得有D貴，不過果日本來就係預左消費，都好啦。
黎到，都符合預期，好食。
係咪海魚，我雖然唔敢話食魚專家，但都自問係海係養，都分得到。
呢D老店，你都唔好Expect有咩野擺盤，重點係好食就算。
切得好靚果D魚片，我反而覺得單薄。頭鮫，同腩位厚切，至真正食到魚味。
埋單一斤560，其實都OK，我窮還窮，但幾百蚊消費，就算最窄嘅時候，都唔會話使唔起。但我個人心理，你話我知560蚊斤，接受到，話曬都成斤魚俾你食。但35蚊兩，成份早餐A價錢，先得一兩魚，就覺得好貴。其實呢個心理，係我個人獨特，定大家都有類似感覺？？如果大部分人都有我呢個心理錯覺，其實D海鮮酒家會唔會考慮多D用斤報價，可能會容易D Sell啊。
最抵係。。。阿叔話叫魚，可以Free個鍋底俾我。如果單點，唔一百都幾十啦。最後仲同我講，兩支大啤都請埋我。（我都幾飲得，果日真係做野做到無電，先脆脆地兩支，如果我知道有人請，4、5枝我一個人都飲到，當然，如果飲4、5枝會唔會都Free，就好難講。）
呢兩樣野都值百幾，計返，碟魚真係唔貴。
兩個人八百幾，食得精，真係算抵食。
結論：呢間野，唔好俾門口D貴價海鮮嚇親，如果你唔係特登要叫齊龍蝦鮑魚象拔蚌，以呢個質素，真係一D都唔貴。
（順便一提，我之前成班去食果D火鍋放題，高級D，咪就係一開始俾碟好普通貨仔刺身拼盤，都人均四百幾，但除左碟刺身同第一碟手切牛，之後任叫果D全部佳寳丸同肥牛，我覺得先係真貴。）